NGADUNGKUK – fbs

FIKMIN # NGADUNGKUK #

Nembè 2 dinten satutasna diistrènan, nyalikan rohangan kalayan aya jamban dilebet. Asa reueus, ma’lum biasana buar biur numpak motor butut marios BOP, ayeuna mah di kantor.

Pas lebet ka jamban badè kahampangan, ngadungkup taeun teu acan dibanjur. Kapaksa manjuran heula. Padamel nu nyepeng konci rohangan dikempelkeun, ditakon. Koncina disungkeun sadayana.

Dinten ènjingna muka konci rohangan, calik dina mèja bari ngaroris serat nu lebet. Teu lami hoyong kahampangan, ngabujeng ka jamban.

Pas muka panto jamban, nincak kalebet. Olohok ningal taeun parantos ngadungkuk deui. “Astagfirullloh, saha nu miceun deui di dieu?” Ngagorowok nyalira. Sadayana padamel dikempelkeun deui, teu aya nu rumaos. Bingung.

Pasosonten nembè aya waleranna. Sabot nuju ngadisposisi serat, aya nu ngolèbat. Teras panto jamban muka nyalira. Simkuring ngagorowok,
“Mangga badè nganggo jamban mah, ulah hilap dibanjur”

Kadangu deui cai ngocor ti jamban. Teras jempling. Sajorèlat aya nu ngageleber, hideung. Ti harita teu aya deui nu ngadungkuk di jamban. (AKW).