Tag: gempungan

SANÈS KITU – fbs

Karandapan pisan, ambuing.

FIKMIN # SANÈS KITU #

Gempungan pasosonten, Jang Ulis kerung macoco kana layar lèptop, ramona mencètan kibod pikeun nyatet sagala rupi kecap nu kadangu. Ki Lurah nu janten pupuhu gempungan katingal rada teu raos manah. Sagala rupi didugikeun anapon nu sanès padamelan.

Rèngrèngan Kadus nu tadina ngadugikeun pamendakna ngadadak rèpèh. Sapalih tungkul margi biantara Ki Lurah asa sanès ngabahas bagbagan pasualan dèsa. Tapi langkung seueur urusan pribadi nu langkung paos dibadantenkeun diluar gempungan ieu.

Ulis mah teu seueur saur, teras wè ngetik dina lèptop. Tring! Aya WA lebet, dirèrèt geuning ti bojona, “Akang nuju naon?’

Ulis teu wantun nyepeng hapè margi nuju gempungan, bilih diseuseulan pupuhu. Tapi teu ngawaler WA bojo ogè tiasa janten masalah ageung. Dicobi dina lèptop ngangge WA wèb, ‘Hapunten nuju gempungan, geulis’

Teu lami, Ki Lurah lirèn cumarios. Hadirin nahan rènghap. Ki lurah ningal ka katuhu, melong raray Ulis bari ngiceupan, “Nembè nga WA?”
Ulis ngembang kadu.

Paburisat – fbs

Gempungan bubar sabab aya kajadian.

BALI, akwnulis.com. Réngsé ngiluan upacara, dituluykeun gempungan jeung balad sakantor. Dunungan teu loba nyarita ngalér ngidul, tapi langsung kana inti pasualan. Nu haladir unggeuk-unggeukan bari kutrat kotrét dina buku catetan séwang-séwangan.

“Tah kitu bapak miwah ibu, intina tina gempungan ieu, urang kedah kompak ogé silih tulungan tur silih ajénan pikeun kamajuan organisasi urang!”

“Muhuuun gan!” Waleran saur manuk minuhan rohangan. Raray dunungan marahmay.

Sakumaha ilaharna, lalawuh gempungan sayogi dina méja. Bala-bala, géhu, jeung comro haneut favoritna, ogé céngek domba. Teu poho aqua gelas méh teu kabeureuyan.

“Astagfirulohaladzim!!” Mang Ajaw ngagorowok, ningali Haji Opan biwirna ngabudah. Kabéh paburisat, reuwas. “Buru tulungan!!” Haji Opan kapiuhan, gempungan bubar.

Haji Opan dipayang ka Klinik, kudu gancang diubaran.

Alhamdulillah cageur saharita, da geuning teu nanaon. Ukur salah ngaheumheum Enervon C. Batur mah diasupkeun kana cai, tuluy diinum. Ari Haji Opan mah dihuapkeun, atuh ngaburukbuk dina baham. Aya-aya waé. Cag. (AKW).