Tag: fbs

RAMO PATARÈMA – fbs

Lalakon harita dina mangsana.

FIKMIN # RAMO PATARÈMA #

Mung sakedap ramo anjeun nyepeng pageuh, tapi geterna matak geunjleung batin. Sakilat mulangkeun ilapat, sajorèlat katresna baheula ngajadi dihin pinasti. Mung sakedap ramo patepang ramo, mapah pagèyè-gèyè. Asa bumi alam èndah lir ibarat sawarga. Sumawonna nu ngaralangkung kalebet nu naringalikeun téh, istuning dianggap teu aya. Dunya milik duaan tèa.

Kecap sono, rindat deudeuh tos teu ngalangkungan baham deui, tapi diwakilan ku ramo nu tos badami pageuh. Sanaos mung sakedap.

Ngarènghap mah antarè, tapi gedur jajantung matak tagiwur. Nahan rasa nu rumasa sanajan sèsa tapi geuning masih kuateun maksa. Basa harita kadeudeuh duaan teu manggapulia, èndah matak betah, bingah amarwatasuta.

Ramo nu lentik diusapan lalaunan, deudeuh nyai kikindeuwan. Ayeuna nyata aya sasarengan.

Sabot keur anteng, kadangu aya gorowok gigireun, “Kii, nuju naon. Naha ngusapan pager?” Sora halimpu incu ngagareuwahkeun. Gebeg!! Culang cileung, geuning sorangan di dieu tèh.

“Itu Nini Ijah mah nuju mulungan runtah” Curuk bentik incu nojo ka juru taman. (AKW).

LATSAR – fbs

Pangalaman Latsar, adaw.

FIKMIN # LATSAR #

“Bro, tulungan, sok aya nu noong mun keur mandi” pamènta ti babaturan awèwè nu ngiluan diklatsar.
“Siap, keun ku Ibro urang bèrèskeun” Uing ngajawab pertèntang. Peutingna sanggeus apel malam langsung sasadiaan, nèangan gantar. Alhamdulillah aya beusi urut tihang bandèra. Lumayan.

Jam 03.00  hudang, beusi panjang dibawa. Keketeyepan muru jamban asrama putri. Muka panto, asup bari nèangan posisi strategis, keur ngagareuwahkeun nu beuki noong. Teu lila aya tiluan siswa awèwè nu rèk marandi. Pas ngaliwatan uing, tiluannana surti.

Nu tiluan mimiti nyoo cai dina bak panjang, maklum jamban asrama mah bak babarengan.

Kaciri dina para aya nu leumpang lalaunan ngadeukeutan.Pas diluhurueun, besi panjang dirojokkeun.

Coss!
“Waddawww…”

Kolèang murag ti para.

Gejebur!!!…
“Taaah, beunang……”
Babaturan awèwè rècèt. Uing ngadeukeutan nu murag, rèk diteunggeul beungetna sina kapok.

Peureup geus ngeupeul tinggal neunggeul, panon olohok. Eureun saharita.

Dihareupeun dina jero bak panjang. kaciri pelatih latsar, awak jibrug tarang bohak getihan. Cag. (AKW).

IHTIAR – fbs

Sugan tèh enya…

FIKMIN # IHTIAR #

Ngahuleng dina golodog bari ningalikeun nu ngaliwat. Sakapeung unggeuk mun aya nu uluk salam, tapi sok olohok ogè dina mangsana nu ngaliwat jiga hayam. Teu jadi ambek atawa kumaha, keun waè di ridokeun. Boa teu uluk salam tèh da teu ningali uing nu keur cinutrung.

Diuk di golodog tèh lain saukur keur ngabangbrangkeun rasa tapi justru dina jero hatè keur wirid nguatkeun du’a. Aya kahayang, aya pamaksadan. Ieu imah nu boga sagala carita, harita dina mangsana mitembeyan kahirupan rumah tangga jeung si jenat, rèk dijual.

Sugan wè bisa jadi rejeki duit nu leuwih barokah. Sanajan dina nyatana keur hèsè ayeuna mah, tapi tarèkah kudu tuluy diihtiaran bari teu poho, ngadu’a ka Allah nu Maha Kawasa.

Sabot melong kosong ka jalan nu geus suwung patalimarga. Reg tèh aya mobil boks eureun. Gebeg, asa kagareuwahkeun.

“Ua punten nyanggakeun pakèt kanggè Uwa istri” gorowok supirna.

Can gè ngajawab, geus kareungeu nu lalumpatan ti jero imah. “Alhamdulillah pakèt tos darugi, nuhun Aa”

Jikan jeung maruna marahmay, bari  muru pakèt sèwang – sèwangan. (AKW).

NGANTÈT – fbs

Ngotrèt deui basa sunda

Latihan Wushu

Fikmin # Ngantèt #

“Hayu euy latihan” Gorowok Si Acun bari mawa pakarang panjang ipis hèrang. Ajat, Apud jeung Uing geuwat nepungan. Ajat jeung Uing mawa bedog hèrang, ari si Apud mah leuwih gagah, tumbak panjang.

Geus ngumpul di tengah lapang, kabèh sayaga masang formasi. Usèp jeung Unang bagian nabeuh.

“Jrèng dung jrèng dung jrèng!!!”

“Ciaaat…..” kabèh ngembatkeun jurus, peureup jeung tatajong nu anca. Jungkir bari mawa pakarang. Tartib sakumaha pituduh ti Engko Jujun, guru sarèrèa.

Teu karasa latihan Wushu tèh lekasan, hasilna nyugemakeun. Dua poè deui rèk minton di buruan kantor dèsa. Gabung jeung grup liong ti lembur tatangga.

Pawey oncor

“Balik tiheula nya, kè ngumpul deui di buruan masjid. Ulah poho mawa oncor tèa!!” gorowok Usep.

“Siap kumendaaan” dijawab saur manuk.

Peutingna ngaji heula ti magrib nepika isya. Geus kitu ngumpul di buruan masjid, karèk ngabring nguruling lembur, pawey oncor Rajaban. Si Acun megat ti imahna. Suka bungah taun ieu, imlek jeung rajaban ngantèt. (AKW).

****

EMBUNG ÈLÈH – fbs

Mantak ulah hog hag waè…

FIKMIN #EMBUNG ÈLÈH#

Wanci burit geus kaliwat lila pisan, bèak ku nu ngawangkong ngabahas sagala rupa. Tadina sugan tèh wanci sareureuh budak mah geus lekasan. Tapi geuning ngadeukeutan wanci indung peuting, nu badami beuki rongkah. Patèmbalan embung èlèh. Padahal ukur ku nyebut nuhun bari imut kanjut, moal lila babadamian tèh.

Ku sabab sarua pinter, antukna guntreng tèh kana sagalarupa. Bubat babèt urusan lian, tapi tuluy silih tagenan. Atuh parèa-rèa omong tèh beuki mahabu. Tungtungna ngabeledag, sora bedas meupeuskeun rasa. Nu keur pacèntang – cèntang ngajengkang katukang.

Nu lainnya ogè katindihan, aya nu ngacleng kaluar jandèla sabab awakna leutik tur ipis. Nu awakna kandel mah nagen, ukur ngèsèr saetik. Kabèh ngahuleng, teu nyangka geuning tanaga pasèa tèh badag kacida.

Kabèh ngaheunggeu teu puguh rasa. Tapi aya nu sarua, baham rapet teu bisa disada. Ukur leungeun nu pakupis pepeta. Bari beungeut sepa, teu aya getihan.

Dijuru dua mahluk hideung halughug sareuri bari tutunjuk, “Matak tong patugeng-tugeng. Belegug.” (AKW).

CESPLENG – fbs

Langsung damang da…

RANCAEKEK, akwnulis.id. Sibuk adalah satu kata yang mewakili rangkaian aktifitas yang menyita waktu, tenaga, pikiran hingga perasaan. Tapi tentu kembali kepada kita untuk memegang kendali bahwa 24 jam adalah waktu satu hari dan aturlah sesuai kemampuan diri.

Maka disela-sela kesibukan itu, hadirkan sisi lain dan munculkan penyeimbang rasa sehingga sebuah konsistensi menulis tetap hadir secara berkala. Mungkin bukan kualitas tulisan yang terindeks sebagai jurnal internasional, tetapi tulisan sederhana pendek saja namun miliki misi untuk melestarikan bahasa ibunda.

Inilah goresan jempol di atas keyboard virtual di smartphone kali ini. Seperti biasa jikalau ada pembaca yang tidak memahaminya, angkat tangan saja atau japri seperti biasa. Selamat pagiii….

Silahkan.. selamat membaca.

FIKMIN # CESPLENG #

Gempungan ti kantor karèk bubar wanci tumorek, balik meulah peuting nu jempling. Nyetir gagalèongan tapi dikuat-kuatkeun. Hanjakal poho teu mawa konci sèrep imah. Rèk gegedor bisi ibur tatangga, nelepon euweuh nu ngangkat. Ukur nini antèh jeung candramawat nu nempokeun.

Tungtungna maksakeun sarè dina mobil, nyarandè, reup teu inget bumi alam.

“Assolaaaatu hoirum minannauuuuu!!!”

Gebeg hudang, karasa sirah beurat sabeulah. Leng puyeng “Astagfirullohal adzim, kunaon ieu?” Lalaunan hudang, muka panto mobil muru ka gerbang imah nu geus dibuka ku jikan.

Maksakeun mandi cihaneut, tuluy sholat shubuh. Ngagolèr deui ngararasakeun sirah nyut-nyutan. Nèangan ubar suwung, nya ngagolèr wè bari cirambay.

“Kring… kring..!!” Sora hapè, maksakeun hudang. “Euleuh dunungan… Hallow bapak!”

Dunungan nyoroscos, ukur dua pilihan, dititah atawa dicarèkan. Porolok kèsang badag, kèsang tiis mapay beungeut ogè karasa saawak-awak. Satèngah jam ngadangukeun. Saenggeus beres ditelepon aya nu bèda, puyeng leungit jangar ngilang. Seger jeung karasa harampang, Alhamdulillah. (AKW)

AMBEK – fbs

Menulis singkat dan melestarikan bahasa ibunda, ini dia…

Ambek by Canva-akw

ALUN – ALUN BANDUNG, akwnulis.id. Siang menjelang sore di hari minggu, mari luangkan sedikit waktu untuk menulis sesuatu. Saya sih memilih menulis dalam genre fiksimini berbahasa sunda. Karena cukup 3 sampai 4 paragraf saja sudah sampai 150 kata, usahakan sudah menjadi sebuah cerita. Meskipun itu adalah cerita fiksi atau rekaan semata. Bisa juga dari pengalaman pribadi pembaca, tapi berdasarkan pengalaman pribadi atau cerita dari rekan kerja, juga mengarang bebas sesuai selera. Ditambah dengan menjadi cara melestarikan bahasa ibunda, bahasa sunda.

Selamat menulis.. eh selamat membaca. Have a nice weekend to all.

***

FIKMIN # AMBEK #

Kilangbara ngabèjaan sanajan ukur ajak jawa, ieu mah lebeng. Istuning mopohokeun tèh teu kira – kira. Padahal baheula mah teu sirikna unggak usik nanyakeun bèja. Tapi da kitu geuning ngaranna jelema.

Mimitina mah aya rasa keuheul, sabab asa disapirakeun. Insyaalloh teu aya dendam, ukur inget waè teu bisa mopohokeun.

Komo basa ningali dina medsosna mah, meuni somèah tur teu welèh daria. Ambek nyedek tanagi midek. Hayang ngamuk tapi da saha urang, meureun baheula salah milih manèhna jadi babaturan.

Kakeuheul ngumpul jadi tanaga, èmosi diri nambahan beuki tohaga. Teu antaparah deui, clak kana motor RX king si kukut tèa. Biur ka dayeuh, rèk ngalubarkan sagala rasa.

Nepi ka nu dijugjug, teu antaparah deui. Sagala ditunjuk, tina hayam, sapi, lauk, jeroan sakabèh sambel nu aya. Sumawonna sangu bodas, sangu beureum jeung tutug oncom kudu sayaga.

Alhamdulillah, rèngsè dahar beuteung seubeuh èmosi reureuh. Keun babaturan mah bisa nèangan deui, nu penting awak jagjag uteuk waras. Am deui ah. (AKW).

***

KENYOT – fbs

Tulisan curhat seorang kawan, kenyot.

Kenyot / akw.

CIREBON, akwnulis.id. Sebuah tulisan singkat hadir dalam bahasa sunda agak sedikit kasar atau istilahnya ungkapan loma (akrab). Tipsnya simpel, baca saja. Paling 2 – 3 menit selesai. Kalau mengerti ya sudah, kalaupun tidak tinggal japri tanyakan mana yang perlu dibahas dan tindaklanjuti.

Selamat membaca, happy weekend kawan.

***

FIKSIMINI # KENYOT #

Matapoè nontorèng nyebrotkeun panasna matak ngebul kana ubun-ubun. Hareudang mah geus puguh da waktuna beurang. Hayang iuh mah engkè peuting, sanggeus matapoè digilir ku bulan sapasi.  Mantakna teu wani lila – lila di buruan hotèl tèh, ukur bisa sakenyot dua kenyot tuluy puntung dipiceun sanajan panjang kènèh.

Rada ambek ogè sabab euweuh rohangan keur ngudud. Bisa di buruan hotèl, di juru deukeut jalan gedè. Meuni teungteuingeun.

Tapi da aturanna kitu, nya wayahna biwir haseum bari ngiluan gempungan nu ngokolakeun urusan nagara.

Keur anteng ngawangkong kadèngè aya wawaran, “Ka sadayana para hadirin anu osok nyesep atanapi ngudug tiasa di rohangan ieu, tapi tetep kedah aya di rohangan dugika rèngsè acara!!”

“Horèeee….” nu hadir aratoh, panèkèr jeung jippo disarada, hurung. Sarupaning mèrk udud tinggalolèr dina mèja. Hadirin tingkarenyot, haseup rokok minuhan acara gempungan. Loba nu bengeutna sumanget, atoh amarwatasuta.

Kakara ayeuna bisa ngudud bebas di rohangan tiis AC, rohangan fbs. Kenyoot. Cag. (AKW).

TAGIWUR – fbs

Ulah salempang Jang..

FIKMIN # TAGIWUR #

Pasosonten ngahaja mapah di taman pengker, maksadna ngabèragkeun hatè nu tagiwur. Biasana layung sok imut masihan kakiatan sanaos ukur katingal ti katebihan. Mung hanjakal, anjog ka taman geuning suwung. Layung pundung disimbut ku pepedut nu kempel ngariung.

Atuh tagiwur tèh nambihan, asa sorangan teu aya balad pakumaha. Tapi lèngkah mah tetep dilempengkeun, mamanawian mendak bagja nu matak ngareugreugkeun.

Lalaunan mapay jalan lempeng, karaos simpè. Geuning teu aya nu haat ngarèncangan,  nu aya ngadon narebihan bari norowèco. Kadangu dua kecap nu matri kana diri, pupujieun sareng uyuhan.

Tapi sanaos layung masih pundung, lèngkah mah kedah teteg. Saha nu terang aya lolongkrang tur bongbolongan.

Di juru taman, rasa marojèngja ogè manah nu titatadi teu pararuguh akhirna tiasa gaduh angkeuhan. Tagiwur ngirangan, layung ogè mimiti katingal. Margi geuning landongna mah teu sesah. Cai wudu ditambih sujud dina tajug di juru taman. Cag. (AKW).

MUNFARID – fbs

Manawi tèh…

FIKMIN # MUNFARID #

Rurusuhan muru imah dines camat, bisi kaburu adzan isya. Ucul – ucul sapatu, muru ka jamban, wudhu. Ngagelar sajadah tengah imah nu molongpong euweuh korsi meja. Ukur karpèt we keur nutupan ubin, lumayan teu tiis teuing. Maklum karek dicicingan da saacanna kosong.

Kusabab karasa simpe, sanajan munfarid gè maca surat alfatihah tèh ditarikkeun. Pipikiran tèh sugan wè aya anggota satpol pp atawa anggota koramil nu rèk solat jamaahan. Panto hareup muka, jadi nu ngaliwat bisa langsung ningali nu keur solat.

Rokaat kahiji simpe, tah pas rokaat kadua mah alhamdulillah rèang nu nyebat “Aamin.”

Reugreug aya nu ngamakmum. Sigana barudak satpol nu pariket. Bacaan surat bada Alfatihah mah dipanjangkeun, Wadduha lagam bayati.

Tah rèngsè attahiyat ahir dipungkas ku maca salam bari ngalieuk ka katuhu terus ka kènca, teu hilap ngusap beungeut sorangan. Pas malik ka tukang, rèk ningali saha nu ngamakmum, olohok.

Ditukangeun kosong molongpong, ukur sora angin peuting nu ngahiliwir. (AKW).